「我好憎睇一啲演員揸流攤，所以我更加小心唔好俾人話番轉頭。」
張智霖（Chilam）在《蘋果》影樓談到演員的價值時，言辭銳利，愛恨分明。工作以外，現更渴求和家人相處、陪住兒子魔童長大。或者凍齡男神人到中年有危機感，或者那一刻承受着被背叛、人生無常的無奈無力滋味，「人生好有趣就係：未知，但我enjoy所有甜酸苦辣。」自認奄尖也感性，下周47歲的Chilam如是說。
張智霖前經理人梁雅詩涉食價騙92萬元案，日前被判入獄兩年。Chilam早前為新作《L風暴》受訪時，案件仍未判刑，訪問時沒有提問這件事，但講到由20幾歲「Chilam」、30幾歲的「初哥哥」、40幾歲「cool魔」，到今日，「每一段時間都係有悲有喜，𠵱家咁樣答，我會覺得負責任啲。唔會係一個湖面嘅風景畀你日日睇住，而係又要面對自己啦，自己一日一日咁老去；身邊朋友又會唔知點解走咗、逝去，呢個漩渦係越來越接近你嘅家人，人生係有更多課題要去處理。」中年危機逼近？「每一個少年、童年、中年都有危機，我enjoy所有甜酸苦辣，危機都要enjoy。等如你打牌，鋪鋪自摸都冇癮啦。」
事業篇
「我不嬲都咁感性。」張智霖原來是一位感性的批評性演員，口上說着事業只佔人生一小部份，但自己要求同樣很高。
新作《L風暴》繼續演公僕，爆鬚造型查案，和古天樂、鄭嘉穎之間少不了多場具張力的鬥戲，亦有更少見的煙屎牙、紋身佬造型。「我好慣，反而對青靚白淨好唔慣，因為用得太多次。今次比較唔一樣嘅look，畀自己認住其實我做緊乜戲，亦畀觀眾見到唔同形象，咦，呢條友仔都唔係揸流攤喎！」槍林彈雨，受傷難免，「頂得住，如果要做一個出色演員，文戲你都唔會舒服。好似演植物人，你用咗兩個月時間去prepare，演個時，嘩！塊面啲肉係鬆弛晒，啲人問：特技點整㗎？整？呢啲咪演員嘅價值囉。」直認奄尖，「你要要求咗自己先，咁觀眾就會覺得你係某一個QC。」
家庭篇
Chilam和袁詠儀（靚靚）01年結婚，當年更找黃偉文寫了一首《未婚妻》給太太，二人拖住手行過17個年頭。「今年去咗倫敦，冇乜目的嘅旅行，只係喺街行來行去，我𠵱家鍾意呢種冇計劃嘅旅行，唔想趕頭趕命。能夠陪伴我嘅家人，已經好寶貴，已經99分，其他嘅風景都只係一個裝飾，一個點綴。」
11歲魔童的成長路，Chilam一分一秒都不想錯過，「𠵱家就係體會緊佢不同嘅faces，反叛期都係好正㗎！我知當人一去到彌留時，就會flash back，咁你睇番佢嗰時反叛、掃枱呀各樣，你都會覺得好正。」Chilam捨不得魔童長大，但又矛盾地想他盡快結婚生仔。
至於兒子的未來？Chilam希望魔童做自己拿手的事，「佢話過想做太空人、之後想做足球員、滑板玩家、電競選手，佢覺得過癮嘅事，咁過癮唔代表錯，必須要珍惜每個小朋友嘅菱角同光彩。」Chilam對兒子自由放養式教育，多少和學校及虎媽老婆靚靚有衝突，他對學校因兒子活躍要求魔童見心理醫生，頗有微言，「睇完之後，我唔覺得係一個問題，人生要有不同時期去建立佢自己嘅系列，有時佢曳啲，或者會去摸天花板，有時佢靜啲，或者有時佢depress，咁係唔容許咩？Depress都唔得？要畀啲小朋友去感受自己嘅情緒呀！」
撰文：林妙萍
攝影：郭賢興
化妝：Hetty Kwong
髮型：Vic Kwan of ii Alchemy
【着裙打底】
明星少不了各類代言，超長腿的凍齡男神張智霖亦不例外，代言較冷門的Marc O'Polo。問到他有甚麼穿衣禁忌，如色彩、款式，「基本上冇，連裙都着埋，所以都冇。之前去朋友生日，着咗蘇格蘭男子漢嗰類格仔裙，不過做唔足，因為正統係唔着底褲，咁我唔得。」
更多精采時尚內容，盡在 http://add.appledaily.com。