平時好少同編輯Y一齊出席飯局，星期三晚上大記者吹雞，召集近十位友好到尖東帝苑酒店食順德菜。編輯Y對一啲菜式幾有見解，於是問佢：「乜你對順德菜咁有認識嘅咩？」編輯Y話：「我係順德人，阿媽都係，自細見阿媽在廚房好好心機整一味煎釀鯪魚，非常好味。到𠵱家，阿媽間中煮一兩款順德菜，我哋爭住食。」唔怪得啦，順德人嚟吃順德菜，一定識欣賞或批評。左丁山係東莞佬，自問在呢方面差一皮。
廣東省南番順，幾百年來是魚米之鄉，毛澤東時期除外，因全國皆窮吖嘛。香港不少大商家及銀行創辦人係順德人，盡皆識飲識食，奇怪嘅係，香港冇乜順德菜食肆，要食呀，有錢就去灣仔星月居，平民就去曾智華介紹嘅順德公，經常滿座嘅就有位於租庇利街嘅順德聯誼總會。左丁山三間都去過，星月居最高檔最舒服，不過找數埋單之時，可能會手震少少。
今次到帝苑酒店帝苑軒食中菜，有大記者嘅理由，佢話：「帝苑軒去年搞過一次八月順德菜月，大受歡迎，卒之徇眾要求，延期到九月中先至停。今年咪又再捲土重來，以滿足順德菜食家。」大記者都幾識介紹，佢係呢度熟客，一早有好安排，一睇張菜單，嘩，使唔使咁多呀，幾乎左丁山識得嘅順德菜都有，點食得晒？大廚何偉成師傅出嚟介紹，佢話：「唔使驚，樣樣有啲，係想大家試一下啫，份量唔係太多，你哋應該食得晒嘅！」左丁山見到一味「勒流蒸污糟雞」，乜個名咁難聽㗎！何師傅話：「我自細在順德家鄉，鄉人每見有太陽，就會曬大頭菜，好多人在曬穀場上掂行掂過，腳踩大頭菜，視作等閒。大頭菜用來蒸雞，有啲人就叫做污糟雞。我哋酒店當然乜都洗得乾淨衞生啦，不過使用舊菜名，以示懷舊啫！」何師傅話自小就跟阿媽學整煎釀鯪魚，14歲到酒樓廚房做雜工，從低做起，以前畀大師傅日鬧夜鬧，唔敢哼半句，直到師傅滿意便介紹幾句煮菜心得，好多嘢都係偷師從實戰中慢慢學番嚟嘅，絕無捷徑，煎釀鯪魚，煎大魚頭，大良生拆魚蓉羹等都係心機工夫，馬虎不得。何師傅入廚38年，順德人主理順德菜，有阿媽秘訣，有師傅傳授，有個人心得，真工夫其實得來不易。編輯Y呢位順德阿哥，一路食一路點頭，唔知佢會唔會下次叫埋阿媽嚟食一次家鄉菜呢！