聽到工程Y講沙田第一城之沉降，知佢年紀應已不輕，問佢生肖係乜，佢長嘆一聲：「今年犯太歲，肖雞呀！」哦，即係與林鄭月娥同年，1957年生人。今年係戊戌年，書云辰戌相沖（龍狗），丑刑戌（牛狗）、戌刑未（狗羊），酉戌相害（雞狗），加上戌自刑，都係所謂犯太歲。於是翻讀傅會長講過之狗年運程（本欄1月23日），知道其中龍與雞最煩，因頭上空白，全無吉星拱照，有凶星煩住而無吉星扶助解救！龍年生人即是1952年出生，港鐵主席馬時亨生於1952年2月22日（據網上資料），即是壬辰年壬寅月戊戌日生，是否好命，左丁山唔識，馬主席屬龍則毫無疑問。
八卦講到呢度，講番吓實體先，記者Y拿到一份美國領事館用地契事宜之地政總署回覆，傳畀左丁山睇，叫幫手研究吓內容是否特區政府偏幫美國。睇完又睇，好似冇喎，地政總署回覆嘅要點係：
（一）美領事花園道用地於1950年以公平市價批出予美國政府，年期75年，至2025年止。
（二）美國政府有權續約75年直至2100年！
（三）於批地有效期內（即1950至2015，如續約就至到2100），美國政府可行使選擇權（即call option），買入美領事館用地之永久業權，但須支付一筆公平價值（fair value of the freehold reversion），以及補付地租。
（四）1997年1月，美國通知，有意行使購買權。（猜想：所有香港土地皆是租約地leasehold，無freehold，港英政府不敢答應，留待1997年7月1日成立之特區政府解決。）
（五）特區政府與美國商討談判超過兩年，雙方卒於1999年達成協議，美國政府對花園道領事館用地不能有freehold，只能擁有長期土地租約，為期999年。原本契約之限制性條款則刪除。
（六）美國政府付出之代價及補付地租金額，根據獨立專業評估，繳付港幣4400萬元。
（七）此個案有其特殊性，極為罕有，經行政會議通過後生效。
記者Y問：「係唔係明益美國佬呢？英國退出香港之前，批地興建英國領事館，都無此待遇噃？」咁就可能係嘅，但英國人全靠美國軍隊，先至可以在歐洲擊敗納粹，在亞洲逼日本無條件投降，令英國自日軍手上接收香港，1950年又係中共取得中國政權之後，英國人巴不得美國領事館永遠留在香港，故此批出美國領事館用地之特別優惠條款。此特殊協議，特區政府接手後要尊重契約精神嘅啫，北京亦唔想在收回香港主權期間，橫生枝節也。