旺角有烈女跳橋？讀者阿Mark上星期六（11日）下晝差唔多兩點揸車出旺角，去到亞皆老街天橋嗰陣因為塞車要慢駛，佢見到前面架的士左邊後座車門突然打開，一位着住短褲嘅後生女嬲爆爆咁落車。
手袋被人丟出車
跟住烈女二話不說左腳就擒咗出橋邊欄杆，嚇到阿Mark衝口而出：「嘩，咩料呀？」當呢位烈女另一隻腳檻埋出去時，腳趾卡住欄杆一陣，差啲失平衡，好彩佢扶得實，先冇跌落橋。
咁鬼牙煙，正常都有人衝上去拉住佢啦，但呢個時候，左邊後座車門再打開，有人將個女仔嘅手袋一手丟出車，吓？真係連小記都忍唔住問「咩料呀？」個女仔企喺欄杆外面，好激動咁指住的士入面嘅人鬧咗幾秒，對方冇理佢之餘，架的士仲繼續行，個女仔惟有擒返入橋面上返的士。
阿Mark切去隔籬線之後駛經架的士，見到車上仲有兩個乘客，但全部都冇落車勸個女仔，佢語重心長話︰「呢個女仔真係要帶眼識人！唔理佢係無理取鬧，都應該落車拉住佢啦，佢真係差啲就跌落去㗎。」