法律界的高爾夫球者發燒友數之不盡，卻有一位最常被業界掛於口邊。陳怡蓁（Candi）律師樓內放着一個擺設，一句"The Lawyer is Golfing"，她不單是首位華人女高爾夫球裁判，更鼓勵不少師奶波友步後塵，2015年甚至創辦香港女子公開賽，翌年勝出賽事的美少女高球手陳芷澄取得奧運會入場券。
「嗰次一級燒傷，醫生都問我：你做乜（職業）㗎？」安坐上環律師樓的冷氣辦公室，Candi細數高球裁判的難忘事。搵食來說，她是律師，專為家庭排難解紛；卸下行政服，即變高球裁判，協助賽事順利推進。「讀法律係邏輯訓練，上到庭要同個官解釋，其實同做裁判差唔多，要話畀大家聽點解咁判。」
執業超過27年，現為梁陳彭律師行的顧問。1994年Candi以小白波減壓，其後參賽挑戰自己，「參加比賽就有好多人同你講：『你咁樣唔啱，咁樣唔啱』」，與其聽人指點，不如自我修練，「起碼知道自己有冇錯、或者個波打歪咗，都識得處理」。
2000年於馬來西亞吉隆坡球例學校上堂，2002年再於蘇格蘭聖安德魯斯裁判學校進修。考獲資格成為首位華人女子高球裁判，最初於女裁判還是罕見時都有被球手懷疑的時候，「初初擔任男子賽事嘅裁判，係會有啲奇異，因為唔知你喺度做乜。唔係歧視，而係因為未見過。佢驚你錯，咪擔心囉，有時畀球手drop，佢都唔敢做」，後來接觸多兼信任度增加，「就唔會再話你」。
與「師奶」玩移形換影
原來賽事開始前，裁判通常就要出動，視察場地如坡度等，必要時瞓地碌波測試，小如剪草等事亦不可忽視，「剪多幾多mm，都會影響速度」。比賽期間在負責範圍駐守，遇有爭拗要做裁決，即駕着寫有「Rules」字樣的高球車出動，例如決定拋球（drop）位置，又要決定罰則，以令賽事繼續進行。現場好像不常見裁判影蹤？「我哋會匿喺樹底下……我次次都搽好多層防曬護膚（品）㗎」，「有次去英國做裁判，真係好慘，曬到塊面爛晒，返嚟香港做按摩，個按摩師話要送塊面膜畀我㖭呀……」
當值過後，高球場內的餐廳是Candi的流連地，這天她便與自稱「師奶」的波友兼師妹談論判罰球的技巧，聽大師姐說「表達方法係同情定係好惡咁講，感覺已經差好遠」，Betty與Nancy不停點頭。三女若同場當值，更不時鬧笑話，Candi笑說：「啲鬼佬唔認得我哋邊個打邊個，亂咁叫我哋個名，我哋都照應嘅，成日玩移形換影，哈哈。」
■記者許偉賢
