茶餐廳阿伯阿嬸呢輪唔憂無花生食，他們既不相信黎明天王夥拍茂叔促銷那個得粒金桔的年金計劃，當然更唔信689會放下自在，寬恕搶了佢個位坐正的777。所以689猛撩FCC，阿伯呷了兩啖絲襪奶茶後一錘定音：「佢咁毒，梗係想啄死奶媽，向阿爺密告，話佢掛住fb直播推高民望，對港獨放軟手腳。」
幾個阿伯點頭，阿嬸則熟讀通勝，認為689生於鬼節，命水惡邪，邪永不能勝正，恐怕佢大運行埋今年就玩完。「FCC租約到2023年，大叔佢未必等到啦，之前就要為當年靜雞雞冇申報落袋那五千萬，找數！唔使鬥長命，佢買年金都唔慌有機會享！」
立法會議員追隨689指揮棒威嚇FCC收檔，其中一個議員到現場聲援，殺無赦唔敢再提，踩外國傳媒場亦唔敢獻醜講英文，無無謂謂混在愛字頭紅旗和中文爛標語中間打卡，阿伯拍枱怒斥：「班友廢嘅，來來去去呢幾招，這還算是專業愛國示威嗎？邊好睇呀！打賞俾乞兒或者天星碼頭扭住屎忽唱大戲的大媽，都唔會益呢班廢柴！」