歐洲超級盃周三喺愛沙尼亞上演，馬德里體育會嘅惡人前鋒迪亞高哥斯達（DC）攞晒采，先喺開波50秒就入波，之後再一腳踢落皇家馬德里「茅王」隊長沙治奧拉莫斯個頭度，再幫馬體會射入扳平2:2，最後馬體會加時後4:2擊敗皇馬，第三次贏得歐超盃，亦係主帥施蒙尼領軍七年嘅第七個冠軍（見附表）。
開波僅50秒，DC就喺窄位勁射入網，成為呢項賽事嘅最快入球。皇馬喺27分鐘由賓施馬頂入扳平，到63分鐘再由拉莫斯主射12碼入網反超前，不過DC喺79分鐘近門追平，雙方要加時，結果馬體會喺98、104分鐘由沙奧尼古斯同佐治高基各入一球贏4:2捧盃。
50秒就入波歐超盃最快
DC喺場上一向惹火，今場去到65分鐘，當佢衝鋒時雖然俾拉莫斯清脆鏟走個波，不過DC就收唔切掣，右腳踢中瞓喺佢身前嘅拉莫斯。上季拉莫斯喺歐聯決賽摔低利物浦嘅穆罕默德沙拿，令到沙拿甩骹傷出，今次就到拉莫斯用頭硬食DC一腳，雖然佢大力向球證投訴，不過球證同埋當時同事發地點好近嘅旁證，都認定DC無意犯規。好彩，最後雙方都冇事，拉莫斯都同DC握番手。
施蒙尼第七冠隊史第一
今場馬體會除咗一報2014及16年歐聯決賽兩敗之仇，亦係首次喺歐戰一場過嘅賽事贏到皇馬，今場要喺看台督師嘅主帥施蒙尼，上任七年以來贏得第七座獎盃，超越咗已故嘅阿拉干尼斯（六冠），成為「床單軍團」奪冠最多教練，相當威水。