星期一（13日）傍晚6點幾，葵芳新都會廣場L4層通去露天廣場花園嘅出入口，一道玻璃門爆裂粉碎，有男童擦損手腳，好彩係輕傷。
失平衡仆地 手膝擦傷
讀者周先生當時都喺平台花園，佢見到一個爸爸帶住一對仔女喺商場出去花園，年約5歲嘅囝囝行喺前面，佢推開左邊嘅玻璃門，爸爸就拖住年約2、3歲嘅囡囡殿後。點知當囝囝將度門推到最盡嗰陣，玻璃門突然砰一聲，成塊玻璃啪啪聲爆裂，一地玻璃碎。
囝囝亦都失平衡向前仆跌喺地下，手掌同膝頭哥擦傷流血，爸爸即刻扶起佢檢查傷勢。相信阿仔都俾突如其來嘅畫面嚇親，呆咗企喺度，商場職員亦都好快到場慰問小朋友，周先生慶幸啲玻璃碎冇彈到小朋友嘅眼，唔係就危險嘞！
商場稍後召救護車到場，救護員幫男童包紮，唔使送院。新都會廣場回應，初步懷疑男童推門幅度過大，令到玻璃門碎裂，但具體原因要進一步調查，商場亦會研究安排相應措施，防止同類事件再發生。