話說堪稱香港「追究權利」收藏家嘅國家領導人、前特首梁振英，日前又出咗律師信，對象係網媒立場新聞同理大學者鍾劍華。佢唔滿意鍾劍華嘅文章，將自己描繪成黑社會成員喎，估唔到鍾Sir真係向梁振英道歉，但都係就搞錯時序道歉，強調根本冇話梁振英係黑社會，若果任何人要對號入座，佢都控制唔到㗎喎。
質疑提練乙錚專欄靠嚇
點解鍾Sir要道歉？因為佢都承認有錯，有錯嘅係佢喺惹嚟梁振英出律師信嘅〈五年前的這件事與梁振英的紅線論〉一文，錯誤地將小桃園飯局嘅發生時間，由梁振英當選前冇幾耐，寫成當選後冇幾耐。
錯就要認、打就企定，鍾Sir係有錯，道歉好應該，好過有啲人將55萬月租都講成象徵式租金都唔肯認錯。
不過道歉歸道歉，鍾Sir亦堅守原則話，佢篇文章講嘅嘢都係事實，小桃園飯局係事實、有江湖人物同埋梁振英競選團隊成員出席小桃園飯局係事實、就連當中有人喺警方之後嘅掃黑行動中被捕，亦係事實。
反而鍾Sir再指出，梁振英封律師信入面提到，佢向《信報》同練乙錚出律師信後，《信報》公開道歉、收回練嘅文章以及練嘅專欄消失呢件事，鍾Sir係咪又可以因此而感到不安或焦慮，然後去報警或者出番律師信畀梁振英，投訴被恐嚇同滋擾？
正如鍾Sir自己話齋，梗係唔會啦，因為佢冇咁無聊同荒謬。鍾Sir臨尾都奉勸梁振英一句，犯咗錯就要勇於承認，共勉之。
李八方