鄧麗欣（Stephy）入行16年，近年在角色上慢慢轉型，不再只有深入民心的阿寶，今年更憑演技初嘗影后，從此電影對她來說，不只是工作，是一種責任，更是一種使命，「我記得攞獎時講過初心不變，希望保持簡單嘅心，去做自己鍾意嘅嘢。」
撰文：陳蔚渝
攝影：郭賢興
化妝：Cyrus Lee
髮型：Euling Chow of IL COLPO
鄧麗欣最近再帶來新形象，在新片《L風暴》中首次挑戰私影妹，片中有不少逃亡、追車、槍林彈雨的場面，「基本上拍呢套戲，我每日都係暴走中度過。」因為《L風暴》，Stephy才首次了解到私影是甚麼，「我發現同我性格、演過嘅戲都相差好遠，所以都好有挑戰性。」戲內與男主角古天樂有不少對手戲，面對前輩沒有壓力，壓力反而來自拿揑角色，「今次套戲比較嚴肅，男性角色比較多，所以導演要求我每場戲都要好有energy，因為只有我嘅角色出現，場面先至有色彩，所以幾有壓力，即係好似要我搞氣氛，但搞氣氛唔係我強項嚟。」
Stephy分享新片中一場跳車逃亡戲，她形容最為難忘，「有場戲最難同最有危險性，因為喺馬路，然後要喺車中間攝嚟攝去，記得都有整親，喺地下碌咗一下皮外傷，動作戲已經難拍，再喺真實環境，要控制車，又要協調走位，其實對大家都有危險性，對我嚟講係一次學習，一次經驗。」即是說觀眾看到短短一分鐘的驚險場面，演員背後的準備功夫與付出其實都難以預計。
「人是多變」
問Stephy近年在戲路上轉型，她則哈哈大笑說人是多變，「打戲好玩咪拍多啲打戲，可能拍得多打戲又覺得好攰，咪拍番多啲愛情戲，舒服啲又唔使喺街跑嚟跑去，喺屋企講吓對白，談吓情都唔出奇。」無論是甚麼戲，Stephy認為只要故事寫得好，便是好戲，「角色唔可以咁有規限，電影有好多唔同類型，唔一定要槍林彈雨先好睇，愛情片都可以好有故事，最緊要有感覺，所以唔會限制自己揀角色。」
今年Stephy初登影后，獲「香港電影評論學會大獎」最佳女演員、「香港電影導演會」最佳女主角，演技備受肯定，她形容攞獎可以是壓力，也可以是原動力，「本份呢個字好緊要，我嘅本份係做好演員嘅責任，責任包括挑選角色、劇本，然後做好佢，呢個係我當下畀自己嘅使命，唔會話要鋪到好遠嘅路，因為我清楚自己，太大壓力可能反而會扣分。我記得攞獎時講過初心不變，希望保持簡單嘅心，去做自己鍾意嘅嘢。」
愛情豐收
2018年過了一大半，但足以讓Stephy形容為豐收年，事業得意，愛情同樣得意，上月公開認戀台灣歌手邱勝翊（王子 )，更經常不忌諱在Ig傳情，「2018年暫時幾好，希望一路都咁好啦。」「熱戀」二字完全寫在臉上。
身邊不少好友都已結婚生仔，問Stephy又可會有計劃？ 「我唔係容易受人影響嘅人，當然朋友幸福我都開心，我已經習慣身邊朋友結婚生仔，已經面對咗好多朋友經歷唔好階段，所以已經見過世面，我自己就隨緣啦。」
開心而靚
34歲Stephy雖然踏入所謂「中女」之齡，但皮膚年齡目測只有25，問及護膚心得，她說：「如果我可以再早瞓啲，早睡早起就更加好，如果唔得惟有做多啲運動，情緒係非常影響皮膚，所以最好嘅方法係令自己開心，皮膚就會靚。」所以現在是很開心嗎？「2018豐收年，所以好開心。」
更多精采時尚內容，盡在 http://add.appledaily.com。