港大法律系副教授戴耀廷今年3月赴台出席論壇時，被建制派指控發表港獨言論，建制派立法會議員何君堯早前就發起「依法聲討戴罪偽學」行動，噚日佢又再有新猷。何君堯同新界關注大聯盟一齊發起網上簽名行動，要求律政司喺噚日起計40日之內起訴戴耀廷；為咗隆重其事，佢哋更加搞咗個「㩒鐘仔」儀式，正式宣佈簽名行動開始。
要律政司40日內檢控
何話佢哋有兩個要求，包括要求律政司起訴戴耀廷，同促請港大暫停戴耀廷所有教學職務，希望40日之內可以收集到10萬個簽名，又話10萬只係「第一口價」，希望越多越好。佢之後補充，40日嘅限期係基於刑事檢控有半年嘅檢控期而定，指戴耀廷喺3月24日喺台灣發表言論，所以9月24日就係半年限期，又話40日內如果律政司唔提出檢控，佢哋考慮提私人起訴喎。