茂叔信心爆棚，豪言年金一百億若果唔夠分，會加碼推夠二百億回饋老餅。結果，老友記唔受，計劃只有49億認購，差一點才合格。認購者當中只得2854位摸頂認購一百萬。年金擺了個大頭但偏離目標勁遠，長者唔吼，政府加大力度促銷，斷然強推下列措施：
一，銀行唔會做義工，改由天星碼頭大媽負責促銷，她們唱住賣，一邊香夭一邊叫人打賞還識執生塞「錢」入大叔袋，風騷叫擁躉買番十萬八萬捧場，一個月下來如果無示威者光復尖沙嘴，應該順利幫到茂叔散貨。
二，林鄭一再保證，香港唔係翻版土耳其。市民信心缺缺，政府落區派錢表誠意。係呀，林鄭和局長踎街，向每個長者派五嚿水。大吉利是，真係「舊」鈔。
三，買年金鬥長命，長者自然渴求社會大和諧，唔希望再來一趟六七暴動八九屠城或者……hm，港獨之父，撩事鬥非，無中生有，添煩添亂，放生佢，等於擴大沉降範圍，不利長治久安。終於，處長坐正，接收777密令，吹雞！做嘢！老友記，安啦。