爆相爆片：火燒連環檔
一級建築險攬炒

有百幾年歷史嘅中環嘉咸街街巿牌檔，噚日凌晨12點幾突然起火，當時喺結志街行返屋企嘅林先生離遠已經見到好大煙，佢初時仲以為有人拜神，再行過啲就見到牌檔火光熊熊，一片火海。咁啱旁邊建築地盤搭起棚架竹枝，火勢蔓延得好快，林先生聽到燒棚架嘅霹啪聲，附近威靈頓街一間酒店大約60個住客都要疏散暫避。

檔主：30幾年未試過

警方接到多個巿民報警，消防派出兩隊煙帽隊開兩條喉救火，大約半個鐘將火救熄，好彩火警冇人受傷。而同火場只有約10米距離嘅一級歷史建築「永和號」唐樓幸保不失。火警燒毀咗6個賣蔬果嘅牌檔，消防初步調查認為起火原因冇可疑。起火嘅嘉咸街牌檔並非巿建局重建發展項目範圍，牌檔旁邊嘅住宅大樓地盤先至係，地盤冇受火警影響。
噚日朝早火場仍然未解封，喺封鎖線外冇受火警波及嘅牌檔可以繼續營業，但喺封鎖線內有部份雖然冇燒到嘅牌檔，亦因為工人要清理現場要休息一天。一頭銀髮嘅檔主區婆婆話，佢喺度開檔擺賣30幾年都未試過火燭，好彩今次冇燒到佢個檔，但因喺封鎖線內，所以都開唔到檔。至於被焚毀嘅牌檔，暫時未知損失幾多。
中西區關注組召集人羅雅寧收到街坊通知後，即刻去現場視察，佢話嘉咸街街巿係全港最古老嘅露天巿集，有百幾年歷史，成個中環以至半山都有好多人會落去買餸，佢都係常客。時至今日，嘉咸街街巿除咗係街坊常到之處，亦係遊客專程去打卡嘅景點之一。火警後，羅小姐收到部份受影響檔主求助，希望巿建局協助重建牌檔。羅小姐指火警的確影響咗街巿嘅運作，希望大家做好防禦措施，唔好再發生同類事件。
資料顯示，嘉咸街街巿喺1840年依山而建，居民喺呢度買日常用品，店舖攤檔都成為老字號，地道風貌吸引咗導演王家衛，佢1994年執導嘅《重慶森林》喺度取景。