曼聯喺今季英超首戰旗開得勝，主場2:1僅勝李斯特城，但論表現就冇乜好評，遠遠唔及利物浦同曼城咁贏盡掌聲。加上紅魔季前增兵冇睇頭，領隊摩連奴公開向高層表現不滿，令外界唔多睇好佢仲可以做幾耐。摩佬都搞唔掂，紅魔仲可以搵邊個教？三奪歐聯冠軍嘅教頭又點睇呢？法國《隊報》報道，今夏宣佈離開皇家馬德里嘅法國球王施丹，可能會轉戰英超執教，目標球會可能就係曼聯。
46歲嘅施丹今年五月帶領皇馬贏得歐聯三連冠軍後隨即請辭，目前冇工作在身。據《隊報》報道，呢位法國名宿已經考慮復出執教，受英超吸引嘅佢對曼聯特別有興趣。曼聯近年大手筆簽入唔少球星，不過依然未能夠重奪失落五季嘅英超冠軍。雖然上季嘅聯賽亞軍已經係自費格遜退休後嘅最好成績，不過同冠軍兼同市宿敵曼城依然有多達19分嘅差距。
「英超爭標唔使預曼聯」
今季曼聯喺轉會方面「閂水喉」，唯一重點收購只係簽入巴西中場費特洛迪古斯，令摩連奴多次公開表示不滿，就連曼聯名宿史高斯都話唔睇好母會，似乎將矛頭指向摩連奴：「睇到曼城同利物浦，我唔認為曼聯嘅質素可以追近佢哋。曼城有偉大嘅領隊同球員，而且目標清晰，但曼聯就好似唔太清楚想點。」
最佳11人冇現役球員
史高斯日前接受訪問嗰陣就挑選咗佢心目中嘅曼聯最佳11人，不過一班後費格遜時代嘅球員就全部冇份，而呢個11人名單之中，就只剩番基斯坦奴朗拿度同朗尼仲未掛靴，可見近年嘅曼聯喺史高斯心目中真係唔多掂。
2016年開始出任曼聯領隊嘅摩連奴，上任以嚟只曾領軍贏得社區盾、英格蘭聯賽盃及歐霸盃冠軍，今夏被傳有機會成為喺球季中被炒嘅英超領隊之一。英國傳媒近月就多次傳出，曼聯嘅管理層都開始頂唔順摩連奴大花筒之餘又抱怨多多，又話呢位葡葡牙領隊有「三季魔咒」，今季隨時又會被炒魷，英國嘅博彩公司仲一度將佢列為被炒領隊熱門。早前有英國傳媒曾經報道，指如果摩連奴離開曼聯嘅話，紅魔希望可以由施丹接掌帥印咁話。
