中環嘉咸街街巿牌檔起火，差啲燒到距離大約10米嘅一級歷史建築「永和號」（圖）。位於威靈頓街120號嘅「永和號」三層高，係全港最古老嘅「背靠側」唐樓建築，舊年獲評為一級歷史建築，𠵱家外牆搭咗棚架同埋綠色圍網進行加固工程。
據講，「永和號」唐樓喺1880年至1894年期間建成，即最長或有138年歷史。1930年代由姓關人家同其他人合資喺地下經營雜貨舖，樓上係住宅。雜貨舖全盛時期吸引唔少官商界及藝人好似田北俊、狄波拉幫襯，直至2008年業主以2,600幾萬將唐樓賣俾市建局，店主亦年老冇辦法繼續經營，雜貨舖喺2009年初結業。
巿建局原本打算只保留唐樓外牆，多個民間團體力倡全幢保育，最後市建局決定全幢保留「永和號」，復修後將其活化。