民主黨前主席卿姐噚日主持網台節目，訪問剛去完馬來西亞唞暑嘅新民黨主席葉劉，葉劉除咗透露有意下屆立法會轉戰「超級區議會」，將現時港島議席讓畀黨內年輕人外，葉劉仲寸爆港鐵因為沙中綫搞到一鑊泡，仲學人搞乜鐵路學院吖。唔知港鐵主席肥馬馬時亨聽完，覺得葉劉呢番說話O唔OK？
話不排除撐用特權法
雖然特首之路唔夠妹妹爭，但葉劉都坦言林鄭上任特首以來民望平穩，立法會氣氛亦好咗，「再冇人話乜嘢689、大話精，你話（當時）成何體統吖？堂堂特首入立法會喎！」但佢話娥特下屬、運房局陳帆因為撞正沙中綫問題民望插水：「佢個班子係比較弱，呢個佢自己都知。」
但就算葉劉覺得政府喺監督沙中綫問題上好有問題，但佢話唔會隨便叫陳帆下台，反而建議政府盡快分拆運房局，話娥特對此最大考慮係究竟仲有乜人肯入熱廚房？過去投票反對立法會用特權法調查港鐵嘅葉劉，話「不排除」支持用特權法，但最好都係政府將現時調查港鐵紅磡站問題嘅獨立委員會職權擴大至調查整條沙中綫，話咁做可能會快啲有結果！
佢席間不忘嘲諷港鐵：「佢哋無謂搞鐵路學院嘞，你自己搞到一鑊泡，仲教人起鐵路？真係笑死人！」卿姐問係咪應該搵早前不斷揭發港鐵工程問題嘅田二少入港鐵做？葉劉聞言後又一貫寸爆指：「佢（田）做就兵變囉！你唔記得兵變咩？佢閒閒哋要夥計等兩個鐘開會，要等到11點過喎」，之後不忘補充「我講吓笑啫」。
李八方