天口㷫，如果食物冇好好處理好易變壞，仲會傳出怪味。就係陣怪味，令讀者熊小姐發現佢喺超巿買嘅食品過期。上周六（11日）熊小姐喺屯門市廣場嘅TASTE買咗一包價值22蚊嘅滷水拼盤，佢話當時冇為意食用日期，攞返屋企食嘅時候，覺得陣味怪怪哋，一睇標籤先發現原來食用日期係9號，即係已過期兩日，佢即刻攞返去同超市理論。
百佳：已致歉退款
雖然職員退咗錢畀熊小姐，但佢覺得職員嘅態度敷衍，一句道歉都冇好似習以為常咁，佢認為超市賣熟食應該注意衞生。不過最令佢驚訝嘅係，佢10分鐘之後再行去超巿熟食部，見到同佢買嘅屬同批次嘅滷水拼盤，本來貼住食用日期係9號，但懷疑有人再貼上食用日期係11號嘅新貼紙遮住舊嗰張，仲由$22減價到$19.8。
熊小姐好嬲：「明知食物過期仲繼續賣畀市民，係罔顧公眾安全，完全冇道德，草菅人命，黑心企業。」可惜當時佢趕時間，冇指正職員就走咗。
百佳超級市場回應指，所出售嘅新鮮滷水食物都係當日製造、包裝同埋食用，有關顧客嘅個案，已經喺當日即時跟進、向佢致歉及退款，除此之外，冇收到其他個案。百佳亦立刻派品質檢定專員巡查及訓示有關滷味櫃位，要嚴格依照程序，準確列印標籤資料，免起誤會。