工聯會汽車交通運輸業總工會九巴同龍運巴士分會不滿資方拒絕加薪5.5%，前日朝早喺沙田新城市廣場巴士總站封站半小時，但查實發起抗議行動嘅汽總九巴分會副主任黎兆聰今年2月底先鬧過月薪車長大聯盟主席葉蔚琳發起工業行動係「攞市民做籌碼」，揚言：「唔會學似啲白癡」。黎噚日朝早接受港台訪問時話喎，當日言論係喺記者會後與同事寒暄時發表，非公開言論，向受到傷害嘅相關人士致歉，「講聲唔好意思，講聲對唔住」。
葉蔚琳：支持其他工會行動
黎兆聰話前日工業行動之後，自己受到好多網上攻擊，強調抗議行動並非為自己，而係為咗12,000名車長嘅福祉。
對於黎兆聰公開致歉，葉蔚琳向《蘋果》指，一直冇將黎嘅說話放喺心，「每個人都有自己想法，自己立場，呢點我好理解，冇乜所謂」。佢話大聯盟曾就今年加薪問題同其他工會討論，當中包括工聯會，佢認同今年加薪應不少於1,500元。對於工聯會揚言或再有更激烈抗爭行動，葉蔚琳表明如其他工會發動工業行動，大聯盟會全力支持。