科技園公司董事局前主席羅范椒芬被傳同創科局局長楊偉雄不和，所以冇得留低，特首林鄭月娥之後委任李嘉誠外甥、有「磅秤大王」之稱嘅查毅超（圖）做新主席。
查毅超今年7月履新，佢噚日同傳媒午宴，就被傳媒問到同楊局長關係如何？佢就話：「關係都唔錯㗎！」點唔錯法先？佢自爆楊局長早前邀請佢出席活動，咁佢當然即刻答應啦，但點知原來活動前一晚要出席埋個飯局，咁啱同一晚佢約咗太太食飯，雖然飯局就冇局長出席，但最後都推咗太太，唔知查太有冇嬲嬲豬？
查實查主席未上場之前已經係科技園董事局成員，話晒都同羅范共事過，咁大家關係又點呢？今次佢就冇正面回應啦。