近日網上流傳一段關於沙拿嘅短片，有球迷就拍到佢塞緊車返球會嗰陣，竟然一邊揸車一邊用手機打短訊。根據英國法例，司機即使喺燈位或者塞車嘅時間使用手提電話都係違法嘅，沙拿貴為英超球星就做咗個壞榜樣喇。
片段公開之後，利物浦決定要解除呢個潛在嘅公關災難，而「拆彈」嘅方法就係「自爆」，利物浦宣佈已經就事件同沙拿同埋默西賽德郡警方傾過：「球會與沙拿商討過後，決定安排佢同警方聯絡，等相關部門跟進有關問題，球會同球員本人都唔會對呢件事作任何評論。」而默西賽德郡警方周一亦都確認，已經得悉有關影片喺網上流傳，發現有一位球員喺駕駛時用手機，並將案件交到相關部門處理。根據當地法例，司機喺駕駛時使用手機最高會被罰200英鎊兼扣減六分。
