32歲嘅西班牙中場大衛施華，喺周一發表公開信宣佈退出國家隊，結束長達12年嘅國際賽生涯，亦都係繼恩尼斯達同碧基之後，第三個喺今屆世盃後宣佈唔再為國出征嘅老隊員。曾經125次為國上陣入35球嘅施華，就係狂牛歷來上陣第六多嘅球員，都係2010世盃同2008、12歐國盃冠軍功臣。
一心一意照顧家庭
效力曼城嘅施華，喺周一撰寫咗一篇公開信，宣佈佢退隊嘅決定，文中提到「西班牙國家隊賦予我所有，亦令到我成長」，並感謝已故嘅狂牛冠軍教頭阿拉干尼斯，形容對方係一位大師，「我永遠唔會忘記佢」。呢名中場大師形容退隊嘅決定好艱難，係「職業生涯之中一個最艱難嘅決定」，並為自己喺國家隊取得嘅成就感到驕傲。32歲嘅施華自2006年開始成為西班牙大國腳，12年嚟為國家隊射入35球，協助狂牛兵團贏得世界盃，並兩奪歐國盃冠軍。不過喺剛過去嘅俄羅斯世界盃，西班牙就令人失望咁喺16強以互射12碼不敵東道主出局。
由於施華嘅囝囝喺17年年底早產，五月先能夠出院，呢大半年施華就不斷喺西班牙同英國兩地飛，而佢喺世盃後都講過，希望有更多時間陪伴屋企人：「自世界盃結束後，我百分百專注喺囝囝身上。老實講，我唔知道我應唔應該繼續為西班牙效力，喺呢一刻，我心目中只有我個仔。」
小白碧基相繼退出
較早之前同屆功臣巴塞隆拿守將碧基都已經退出咗西班牙國家隊，呢名31歲嘅巴塞第三隊長就係因為想專注喺巴塞嘅比賽，而唔再披上國家隊戰衣。碧基曾因為支持加泰羅尼亞獨立嘅立場，喺操練期間被西班牙球迷狂噓，亦傳過同中堅拍檔沙治奧拉莫斯鬧不和。而喺今屆世盃後就退隊嘅仲有現年34歲嘅「小白」恩尼斯達，呢名西班牙傳奇中場除咗喺上場日職以「伯金式轉身」為神戶勝利船射入金球開齋外，仲喺周二當選日職嘅每周最佳球員，睇嚟小白喺日本呢個新戰場都踢得風生水起，真係替佢高興。
目前西班牙只係剩番沙治奧拉莫斯、布斯基斯同埋連拿，係屬於昔日冠軍時代嘅成員。