「只知道是時候拿着鮮花，偏不信萬人面前跪不下。」呢首求婚冧歌，真係征服唔少女士！之但係呢，唔係求婚，無啦啦跪低，做咩啫你？講緊呢位哥仔，居然喺眾目睽睽之下，仲要喺逼到爆炸嘅港鐵車廂入面，喊晒口跪地扭耳仔。俗語都有話「男兒膝下有黃金」，喂阿哥仔！你究竟衰咗啲乜嘢，竟然要咁大犧牲，咁樣同女朋友認錯呀？
或犯咗「男人都會犯嘅錯」
讀者陳小姐星期日（12號）夜晚收工後，跟同事一齊搭港鐵，大約10點40分去到北角月台轉車搭將軍澳線，當佢喺北角站月台等車嗰陣，已經聽到對情侶嘈到拆天，當時月台好多人等緊車，但對情侶一於少理。
上咗車之後，情侶就搵咗位坐低，繼續係咁嘈，「個女仔話『你第幾次呀？我畀咗幾多次機會你呀』。」一講完，個女仔就喊爆，嚇親成車人。咦！唔通哥仔犯咗「所有男人都會犯嘅錯」？喂！阿哥仔，你做返啲嘢好喎！哥仔見到咁嘅情況，都不知所措，只好雙手熊抱住女友，仲成個人伏喺咗女方身上，一臉懊悔，但係都冇用。喺呢個時候戲肉嚟喇，哥仔索性喺眾人面前跪底，喊晒口咁扭耳仔，係咁認錯，完全唔理其他乘客嘅目光。
陳小姐話，佢哋一直嘈到去將軍澳，個女仔想落車，但係哥仔就攞住佢個書包，唔畀女朋友落車，擾攘咗一陣之後，佢哋先一齊落咗車。
女朋友係要嚟錫嘅，激到佢咁嬲嬲豬真係唔啱，但正所謂清官難審家庭事，佢兩位又係成年人，感情問題嘅嘢，都係由當事人自己處理番啦。重點係，呢啲咁尷尬嘅行為，冇咩必要喺咁大庭廣眾嘅地方做箒，要理吓其他乘客嘅感受嘛！
識睇睇留言
車豆：「本來打算原諒都要立即收番，唔要面嘅男人一定會害死你！」
Cherry Wong：「佢只係用男人最有利嘅武器，跪低樓（扭）耳仔，其實佢個心係冇真心改過。」
Leon Wong：「其實愛情係盲目，個男仔很（肯）定做錯好多次，個女仔頂唔順先至爆出嚟。」
Nga Yan Cheng：「點解而家啲人咁樣?一係當眾親熱。一係當眾嘈。」
資料來源：互聯網