冰島足球隊喺今屆世界盃名震四方，香港嘅15歲後生仔亦親身到咗冰島取經，啱啱嘅星期一仲落場同冰島嘅同齡球員作客對戰，結果大敗0比7。
北京隊輸12粒
呢隊香港嘅「U15青年足球隊」獲「We like HK」同「明曦公益基金會」贊助，近日遠赴全國人口只有34萬嘅冰島參加培訓同比賽。有份帶隊同贊助人之一嘅金怡假期主席葉慶寧做番老本行，負責做導遊帶隊，陪住香港隊大戰冰島隊。有份觀戰嘅葉慶寧話，香港人嘅身材始終唔夠外國人嚟，因為冰島嘅15歲男仔，個個都牛高馬大，睇落完全唔似15歲，難怪香港嘅後生仔唔夠人踢，但港隊已經盡晒力，惟有希望今次作賽後，想繼續喺足球發展嘅後生仔要加把勁操弗啲，迎戰未來賽事。
同樣有獲贊助到冰島參與培訓及對賽嘅北京U15青年足球隊，比港隊輸得更慘烈，對冰島輸0比12，認真陰功豬。香港同北京兩隊將於周三喺當地作賽，之後回港。