2015年區議會選舉，有大批傘兵空降參選，其中於東涌南硬撼民建聯副主席周浩鼎嘅王進洋，最終只係以244票之差落敗。可能因為得票高，對建制派構成威脅，王進洋過去三年一直被左報攻擊，話佢「散播港獨」，甚至話「明年參選區議會很大機會被DQ」。
斥左報亂扣帽子
八方問過王進洋，佢怒斥左報「扣帽子」，鬧左報報道前無搵過佢求證，斥「單憑呢兩間報館（《文匯報》和《大公報》），有乜嘢資格去將我同港獨扣上帽子？」佢強調佢唔係主張港獨噃，但就認為社會要思考點解出現獨立嘅聲音，若然再有主張港獨嘅人成功入閘參選，佢都會行出嚟為佢哋助選㗎。
咁佢其實有乜政治立場？佢話自己係「社區派」，平日主要着重社區工作，當遇到大是大非嘅問題時就會盡公民責任，表達支持民主嘅立場。而就算政見與周浩鼎南轅北轍，王進洋坦言有一點好欣賞對方，就係對方嘅「知行合一」，「佢係真心愛呢個（中國共產黨）政權、愛呢一個國家」。