神童力挽狂瀾，助港隊保住保齡球隊精英項目資格。這本是神童升天代表作，但市民樂此不疲追看神童奇事，更愛八卦神童殞落，光環墜地。
15年9月，麥卓賢駕大膽車被警員截停拘捕，他憶述：「我收得好埋，隊內無人知道我惹官非。」神童光芒難掩，醜事同樣一傳千里，法院判刑之日，他以為罰款了事便暪天過海，豈料甫出法庭即遇記者拍照，片刻網上都是「新保齡神童無牌駕駛」的新聞。鏡頭下的他一臉錯愕徬徨，不似平日意氣風發的天才球手，「兩三個鐘後，總會主席打嚟，我一睇來電就知今次大鑊。」
那年麥卓賢於世界盃外圍賽預選賽擊敗胡兆康，雄心壯志要遠征世盃；案件曝光後，保齡球總會指他紀律有問題，褫奪其參賽資格。神童大手一揮，保齡球失控落坑，但球明明已隨輸送帶復上回球機，麥卓賢卻感意興闌珊，飽食終日也不回隊報到，「佢哋一話無得去我就灰咗，唔係咁多機會去一個咁大型嘅世界比賽，我個心好頹唔想練波，成三個月無練，日日瞓覺出去食吓飯咁樣。其實個人好亂，諗緊自己係唔係應該要繼續打保齡球呢。」
匿埋攞波逃避見隊友
神童淪為頑童，最後又要主席苦口婆心勸喻，親手拖帶回家。成名之時，麥卓賢從不理旁人眼光，失意之際，四圍凝視卻成夢魘。麥卓賢說：「主席帶我返入球場裏面，但我唔敢面對隊友，好似放棄咗又返番嚟。隊友感覺好陌生，我唔知人哋點諗，唔係好敢講嘢，真係好尷尬，一入嚟自己就匿埋去攞波，隔咗一兩個月之後先開始會講吓笑。」