剛過去嘅周末，喺人來人往嘅觀塘巧明街街頭，竟見到一名穿水靴的四眼叔撳住個女人喺地，個女人不斷掙扎，大叫大嚷，有途人上前了解，被按地嘅女子大聲話：「佢（男子）話我偷嘢呀！我要驗傷呀！」然後不斷粗言穢語狂罵該名四眼叔。
讀者楊小姐當日早上11時許返工途中見到呢一幕，佢認出兩人都係附近一間工廈樓上食堂嘅職員，估計佢哋應該由食堂內追打到街外。
不斷爆粗狂罵
兩男女拉鋸近分鐘，四眼叔終於放手，女子一度坐起身，大罵四眼叔「不知所謂」，跟住她又再瞓地用手機反拍四眼叔，其間她不斷向途人解釋「佢（四眼叔）話我偷嘢呀！」又叫途人「你哋證明係佢推跌我呀。」有途人即答：「我見唔到呀！」
雖然被女事主痛罵，四眼叔未有開腔還擊，行埋一邊不斷打電話，相當冷靜。但女事主就情緒激動，仲用手機反拍影佢嘅途人。佢之後再指罵四眼叔「佢教人偷錢，拉佢上差館，唔好幫襯呢間公司！」
警方表示，上周六（11日）一名51歲男途人行經巧明街118號對開，見到街頭有一男一女爭執，其間男子報稱女子偷竊，該名途人遂報警求助，但警員到場後搵唔到該對爭執男女，列糾紛事件處理。
小記事後去到有關食堂搵老闆了解，原來佢今個月先接手，佢話嗰位阿姐由上手老闆開始喺度做收銀，但因為阿姐成日鬧人，不時粗言穢語，更曾經試過「唔見錢」，最近連收銀機都整爛埋，於是上周六解僱咗佢。點知阿姐被炒後就周圍鬧人，仲踢爛門外嘅菜牌，水吧師傅唔忿氣追出去，演變成街頭扭打。