MK一向我大晒，我玩晒！大媽掌管一帶！
好景不常，政府掃場，MK唔俾唱，唯有衝入尖沙嘴，轉戰去埋銅鑼灣，你掃我一個場，我要十賠奉還！
嗰批學生肯定佔中後遺症，竟然走嚟尖沙嘴打對台，仲要話我哋係行乞！豈有此理！香港行乞係得到過特首500蚊嘅獎勵金，唔算係犯法喎。
更何況我哋唔係行乞，嗰D外國後生仔女揹咗個背囊擺街寫幾隻字「窮遊世界請支持」就問人拎錢，嗰D就真係行乞啦，你哋學生唔去抗議佢哋？係咪歧視我哋先？
你話我哋唱歌難聽，D高官講嘢仲難聽啦，我都係唱卡拉OK，人哋就話OK就OK，但出到嚟一D都唔OK，結果佢真係OK唔使俾人KO，你哋做乜唔拎住banner去包圍佢哋呢？你話我唱歌係行乞？佢哋好似杜汶澤唱嗰隻歌咁，「Hea喎仲Hea喎，枝釘爭幾寸」，唔止行乞，係行騙啊，仲有大把錢收，你唔抗議佢哋，唔嗌光復沙中綫？
講真喎，我哋每次演出都有幾百個Fan屎跟住，忠心耿耿，最緊要係呢，我哋無派蛇齋餅，佢哋係真心真意鍾意跟住我哋㗎。咁人哋係都鍾意聽我哋唱歌，我都無辦法㗎。你唔明點解有人鍾意我哋，咁我都明點解會有人投嗰D議員一票啦！鹹魚青菜，最重要條路自己揀，仆X唔好喊。
你叫我哋滾回大灣區，又話我哋霸佔你哋嘅地方。後生仔，乜嘢係「我哋」乜嘢係「你哋」？我都有香港身份證㗎，我唔係香港人咩？老老實實啊，你哋仲以為喺香港出世嗰D先叫「真·香港人」咩？你望吓依家出嚟講嘢嗰班高官權貴，個個都係香港永久居民，但個心全部都喺北京嗰邊，佢哋真係霸住香港地方啦。
計我話，好似張局長咁講，你哋嚟聽我哋唱一次，最好喺街頭實習一次，包你對我哋嘅偏見，一掃而空啊﹗係咁啦，我要開show啦。