港鐵沙中綫醜聞接二連三，主責官員運輸及房屋局局長陳帆拒絕問責下台，仲話政府表現「有目共睹」，但似乎民意唔係咁睇，因為香港大學民意研究計劃本月初進行嘅調查顯示，陳帆嘅最新支持率淨值跌至負10個百分點，創出佢上任以嚟嘅新低，而調查正正喺沙中綫工程問題大爆發、港鐵大地震期間進行，唔知結果對佢有乜啟示？
特首三司全跌
港鐵高層因為沙中綫醜聞大地震，但肩負監管責任嘅問責班子絲毫無損，港大喺今個月6至9日以電話訪問1,000名香港巿民，結果發現對比一個月前，13位局長中，6人支持率淨值下跌，4個人仲要負分，當中就以陳帆嘅跌幅最勁，大跌11個百分點至負10，其後由尾數上嚟依次係負8嘅民政事務局局長劉江華、負4嘅教育局局長楊潤雄及負2嘅創新及科技局局長楊偉雄。經常包尾嘅劉江華對於被取代，唔知會唔會飲得杯落？
雖然民望包尾，但陳帆繼續有任務，噚晚啟程到北京，出席聽日同中國鐵路總公司舉行嘅會議。高鐵香港段預計下月23日通車，相信呢個都係會議重點。
而除咗一班局長，民調亦顯示，特首林鄭月娥同三名司長張建宗、陳茂波同鄭若驊都唔好得去邊，四人嘅民望評分都齊齊下跌，林鄭嘅支持率淨值跌七個百分點至僅僅正一個百分點，陳茂波就係三司中最差，民望淨值係負31個百分點。
李八方