特首林鄭又訪京，今次為咩事？之咪又係大灣區。林鄭今日啟程到北京，以成員身份出席聽日舉行嘅粵港澳大灣區建設領導小組首次會議。早前有報道話，呢個小組由掌管港澳事務嘅國務院副總理韓正任組長，港、澳特首林鄭同崔世安會任委員或副組長，係香港特首首次躋身中央頂層組織，難怪要高度重視。而林鄭訪京後仲有大搞作，周五晚破天荒喺晚上8點進行facebook Live，親自聽吓大家對施政報告嘅意見，唔知當日讚好定嬲嬲會多啲呢？
宣傳只提民生不提政治
既然訪京係講大灣區，政制及內地事務局局長聶德權同特首主任陳國基會隨行，周四上午返抵香港。而返港翌日晚，林鄭又有自我創舉，會喺fb做直播，聽吓市民對佢十月發表嘅新一份施政報告，有乜意見。佢喺fb發帖指，如果大家嗰晚唔得閒，唔緊要㗎，可以預先喺佢個post留言，話當晚除咗即場交流，佢都會抽部份留言出嚟回應，仲喺hashtag叫大家「快啲留言啦」、「為香港一齊講」。
八方發現，娥特呢次宣傳直播嘅圖片上，提及咗好多政策範疇，土地供應、房屋、教育、社會福利等乜都有，但就睇唔到提及民主派爭取咗好耐嘅政制改革，期望娥特重啟政改的巿民，會唔會留言問吓娥特，睇吓佢點接招？如果習近平、梁振英、林兆波、容海恩同馬時亨有提問機會，大家又覺得，佢哋會問啲乜？
李八方
