湯文亮確實幾可愛。訪問當日，攝影師和記者在紀惠集團的會議室度位，一顆圓頭忽然從門縫中攝入來，問：「今日使唔使影相㗎？」我們說要，穿著短襯衫斜布褲的他便請大家等等，立即去換西裝，迅速回來後還不住解釋天氣太熱，所以無乜事便衣就算，絲毫沒有「上等人」的架子。
向來隨和的湯文亮對傳媒來者不拒，人氣本來就頗旺。2015年他發表細價樓爆煲論引起全城哄動，知名度頓時幾級跳。細價樓的確是爆了，不過是爆升。結果，這位紀惠集團行政總裁成為「細價樓爆煲論之父」的同時，更慘登燈神行列。這天他嘗試為自己洗冤；被指是燈神，他介意的，是與另一燈神「沈大師」（沈振盈）齊名。
撰文：廖麗濤
記者劈頭就問，有無後悔賭錯市而被鬧足幾年，他說無，又沉唸一陣：「其實我又錯唔晒，我寫完七個月後真係爆咗，樓價跌過20%，理論上都叫啱。」轉頭又笑起來：「但我紅咗呀！」他喜孜孜地說，大家表面見到很多人罵他，但去到平民化地方食飯，其實有人和他打招呼甚至要求合照。「啲人重幫我打圓場，話我都只係好意提醒。」
他又主動說起另一燈神「沈大師」，「今年新年佢幫港股求咗支籤，話係上上籤。我話佢好蠢，最多叫做中下籤。支籤係孫霖中狀元，其中詩文出自五字經，最尾話一日今年始，一年前事空，淒涼百年事，應與百年同，即係話結局唔好，佢居然話上上籤。」
爆煲論原是一番善意
湯文亮從來以投資豪宅甲廈為主，是集團總值400億元物業的操盤人，細價納米樓照計不是自己範疇，爆煲理論點得出來﹖說來，他其實是一番善意。「個陣見到樓價連升27個月，瞓唔著同人行山，收到風話好多公屋居民，因公屋升值賣咗個單位，問財仔借錢去買細價樓，借錢利叠利，又有很多二按，我好擔心呢個情況。」
連他自己也承認：「現在睇嚟係過慮咗。」他說是受誠哥（李嘉誠）打醒，「佢退休時建議政府起多啲公屋，後來我終於明白，公屋戶是有實力，因為一家人住公屋，儲到錢就買細價樓等仔女搬出去。」看來這也與階級觀念有關，湯文亮有丁點難為情：「平日淨係睇到報紙，（公屋）俾人封、俾人淋紅油，賺到錢嘅點會出報紙，咁（判斷）一定係出事啦！」。
「阿嫲話收租係人生樂事」
一片好心，意外換來一夜爆紅之餘，還有挑機者眾，賭細價樓三個月內爆煲，現實走勢卻相反，他攞廿萬出來在福臨門擺「謝輸宴」心甘情願，但對於有人懷疑他製造言論的動機是「質」低樓價自己入市，他就不得不抗議：「我地冇細價樓，一向唔買。」
近年曝光率奇高的湯文亮，家姐是紀惠集團真正揸弗人，福布斯富豪榜排香港第25位的廖湯慧靄（廖太）。訪問一開始，他就聲明關於自己乜都傾得，但千祈唔好講廖太，皆因家姐素來低調，最近罕有接受傳媒訪問，只因其旗下基金捐款8,000萬元支持天主教高等教育發展。
公眾印象是湯文亮是靠家姐發達，他直認家族中的確是女人最強。「我屋企由阿嫲、阿媽同家姐，都好叻做生意。」而紀惠集團今時今日的收租大業，明顯也因他們自細受阿嫲薰陶：「阿嫲話：人生最大樂事係逢賭必勝，第二就係有樓收租，咁第一樣都知無可能啦，咪做第二樣囉。」
「你買樓有租客幫你交租，有人幫你做生意，樓宇又升值，你話係唔係好好﹖」今時今日香港人聽到此話應會恨得牙癢癢，但話說其收租佬職業竟曾教他有些微自卑。「初初創業個陣，見啲外國返來嘅同學，派親名片都係外資大銀行副總裁，銜頭好勁，我張卡片就細微細眼，總之好似無乜社會地位。」
萬事有商量的包租公
根據資料，湯文亮1966年從澳門來港，在當時的浸會書院讀了一年，便到加拿大升學，畢業後繼續留在當地工作。後來家姐打算創業，召他回港。「當初都好大掙扎㗎，因為我做緊車行經紀，好好生意，公司訂quota係一個月賣一架車，但我講緊一日賣一部！都唔知點解咁厲害。」他笑稱，因為家姐叫到，阿媽又幫口，自己想想金牌sales也花無百日紅，於是回流。「起初做財務公司，得兩個夥計，加埋我同家姐四個人，但公司太細無得做，之後開始買豪宅，翻新後再出租，主要是做鬼佬生意，佢哋來到香港好多嘢都唔知，我哋盡可能提供最多嘅服務，租務生意做得唔錯。」再後來的故事，大家已經知道。
收租佬一做三十幾年，湯文亮自覺得心應手。「我應付租客叻，從未同一個租客打過官司，有問題就來會議室傾。」他的哲學是租客有難，要盡量助他渡過，所以萬事有商量：「曾經有個澳洲客，租我哋一層寫字樓，欠咗七、八個月租。我叫鬼佬上來，佢話佢公司有得做，但就無能力一次交返欠租。我話得！取消舊租約，簽個新約，將你欠嘅租攤分去未來三年，我唔收你利息。結果佢又生存到，交到租。」他強調要幫租客，不是說動不動就踢走他，當然也是現實考慮：「你要搵人都好辛苦，你估打個電話就有人租？」
而現在他幾乎可以繞埋雙手，放心把租務交給仔女同事處理，只在遇上奇難雜症才出手。「所以咪咁多時間日日寫嘢。」他說現在人生最幸福，剛有了外孫，公司又上了軌道。最辛苦的工作，就是諗點呃like， 「寫『那日上了排價跌了一半的紅van……』，咁我點寫落去話自己去搭紅van呢?」
事實上，湯文亮人氣急升後，約稿不斷、書都出咗幾本。「我計過呢十年一共寫咗六千篇文呀！我仲有好多理論，之後會寫庶民經濟學，即是普通人都識睇個啲。」他得意，記者隨口問現被尊稱「博士」的他，真正志趣是否研究學術寫文章﹖他倒坦率：「邊搵到食㗎，現在有咗錢先可以做箒。」
對未來樓市「唔係好肯定」
市場傳聞，他曾打算自立門戶搞地產，甚至「有檔嘢」。向他求證，他澄清自己唯一是十多年前試過投資大陸一間玩具廠。「初時見到人做廠好開心，實際上好煩，又要應酬，上面咁多官，又介紹你見邊個邊個，我飲（酒）都飲唔掂，後來我話唔好搞，好易瓜，做咗幾年就走咗。」
他堅稱從沒任何其他大計：「我自己都有二、三十億物業收租就真，但個啲同公司分得好開，廖太都知。」他不肯透露他在紀惠的股份有幾多，只肯說廖太當然最大份，又早早對將來分配作安排，自己同仔女都好安心，因為家姐好公道。「而且，單係我自己私己錢都使唔晒啦。」他擰過頭望望會議室幾個大酒櫃。「除咗飲吓酒食吓飯，我真係無乜地方要使錢。」
來個總結，在2018年8月，中原城市領先指數升至190的當下，問湯文亮對未來樓市，尤其細價樓走勢的睇法，他帶遲疑：「真係唔係好肯定！?」。此時此刻，晉身KOL日日就國際香港社會事無大小都發表意見的他，對再一次的樓市燈神危機似乎可免則免。
