內地人追捧美心流心奶黃月餅，益咗南亞排隊黨，對於香港人嚟講，可能今年有另一種月餅更吸引。西環一間有30幾年歷史嘅餅店推出「粗口月餅」，聲稱要為港人減壓，笑言：「到時你想送畀老細、奶奶、新抱、高官，就隨便你喇。」
呢間搞鬼餅店係位於西環嘅華爾登餅店，資料顯示佢哋1984年開店，至今有30幾年歷史。餅店日前喺facebook專頁推出「X你咩 哈哈」月餅（圖），隨即引來網民蜂擁訂購，前晚再喺專頁預告，未來將會推出一系列粗口月餅，包括「打七你 寶寶」、「心好累 仆街」、「好X正 呀喂」、「X你咩 哈哈」、「痴膠線 親親」同「係愛呀 哈利」。未正式發售先哄動，有網民話要儲齊一套，更有網民提議，「可唔可以出隻一盒有晒6個款？」，唔知會唔會掀起全城炒風？