外國海關人員分唔清中港台澳護照嘅事，時有所聞，航空公司都有類似情況。瑞士航空近日就被發現官網嘅位置選項，用咗中國國旗配以「香港」選項，引嚟網民喺瑞航facebook專頁「口誅筆伐」，甚至聲言要罷搭。
新民主同盟荃灣區議員譚凱邦都向瑞航發公開信，要求官網刪去中國國旗，話根據《基本法》第10條，「香港特別行政區的區旗是五星花蕊的紫荊花紅旗」，而香港係實行「一國兩制」，享有高度自治，同內地之間又有邊界劃分，兼用唔同嘅護照，所以覺得瑞航呢個舉動喺「一國兩制」下係「inappropriate（不當）」，令唔少港人不滿，覺得被侮辱。睇返瑞航專頁，確實吸咗唔少嬲嬲，網民一語中的，留言「香港不是中國」抒發心聲。