成班老鬼坐埋吃午飯，講起陳浩天，人人都唔知佢係乜水，於是個個望住左丁山。哎，自己唔係通天曉，邊知得咁多呀，只記得記者G放假上機前提過，甚麼民族黨，陳浩天，好多記者行家都不記得是何許人也，點知保安局大張旗鼓咁去砌佢，跟住建制派應聲撲出來大罵，我地先至記起有一個咁嘅人。
咪係囉，依家多得外交特派員公署及梁振英，陳浩天成為國際傳媒留意對象㖭，CY在fb發炮，罵FCC濫用新聞自由之名，一時之間，全港都知道今日（8月14日）陳浩天會到FCC演講香港民族主義，呢位先生今年28歲，讀過迦密柏雨中學，大埔卍慈中學，理工大學，主修工程及工商管理，曾到過上海交通大學及瑞典馬普薩拉大學做交換生。如此教育背景，相信佢到FCC講英文，唔會叻得過留學英國讀法律嘅周浩鼎律師，民建聯點解唔請周律師去FCC聽講，即場與佢鬥講英文，鬥垮鬥臭佢呢？CY又係理工大學（昔日香港工專）大師兄，留學英國，講英文必定叻過陳浩天啦（注意，CY係英皇書院畢業嘅，肯定排名高過柏雨、卍慈兩間中學），若親自去FCC出席午餐會，FCC會倒履相迎，陳浩天怕會見到佢就怯場唔敢講英文都似！
香港建制派素來只識用大棍扑人，最興搞甚麼「全城憤慨，全城怒吼」，跟住甚麼省市縣工商社團宗親同鄉會等等出錢（建制派最不缺錢）買全版全版廣告嚟聲討「眼中釘」，未見過有一次建制派會派出能言善辯之士去出席，踩場，與「眼中釘」辯論，以理服人嘅。建制派有咁多文字「寫手」，才子才女，教授，醫生，工程師在報紙上寫文批判他人，為何總沒有一兩個雄辯滔滔嘅「講手」出嚟見吓人，唔係冇錢培養呀？平時FCC有不少演講，未必次次爆棚，今日就多得CY等人大力宣傳，相信今日FCC二樓大廳（main dining room）必定座無虛席。左丁山之前唔知道有陳浩天演講，已約好朋友飯局，總不能為咗睇熱鬧而爽約嘅啫，中環老友話齋，CY好有記性，到2023年FCC雪廠街會所租約期滿之時，唔知會唔會畀政府玩殘呢？到時來一招公開投標，租金高者得嘅話，自然有愛國社團出價，月租一二百萬濕濕碎啦，務要頂死FCC為止，租來做香港全國政協人大代表會所，由全國政協副主席梁振英坐鎮會所，好威風啫！