噚日中午一架新巴行駛至石硤尾期間，懷疑為閃避路人而急煞車，導致車上一個阿婆跌低，當場跌傷頭部同頸部，頭破血流，好在阿婆一直清醒，最後由救護車送往醫院治理。
嗌得悽慘搵阿女
事發喺噚日下午12點幾，當時一架新巴702號線巴士正由九龍塘前往海麗邨方向，當沿南昌街行駛至巴域街交界見紅燈停車。讀者劉先生話，交通燈轉綠燈巴士開車時，一個女途人突然衝出馬路，巴士司機見情況即刻煞車。由於現場係一條斜路，下層姓李（81歲）婆婆企唔穩跌倒，撼傷個頭流到一地血。
劉先生指當時婆婆嗌得好悽慘，話要搵佢個女，有乘客馬上詢問電話號碼幫手聯絡。由於唔知道佢傷勢如何，所以車上眾人決定唔擅自郁動婆婆，等待專業嘅救護員處理。好在唔夠5分鐘白車已經到達，將婆婆送往醫院治理。
新巴發言人表示，涉事巴士按交通燈號停車後起步時，一個途人突然從巴士左邊車頭行出馬路，車長立即停車，車上一個乘客跌倒，車長馬上通知車務控制中心，其餘乘客轉乘其他巴士離開。