遭盜竊嘅店舖經理公開閉路電視片段，並向一對涉案男女下最後通牒，表明為避免疑懷孕嘅女事主要坐監而設寬限期。大律師陸偉雄表示，喺網上公開未被法庭定罪嘅人有一定風險，因為即使法官審訊時唔會受影響，但若果經調查或審訊後，證明被點名嘅當事人無罪，對方或會反過來追究名譽受損，甚至控告公開片段者誹謗。
陸認為，如果店舖懷疑有人盜竊，唔適宜私自表明限期內歸還就唔追究，以免發出一個錯誤嘅訊息，以為只要唔畀人發現就可以肆意偷竊，更甚是即使盜竊事敗，仍然可以僥倖逃避法律責任，「此風不可長，一個人犯法就係犯法」。陸表示，如果發現有人犯法，最妥善嘅做法都係報警，交由警方調查，除咗可避免發生誤會，引起不必要嘅爭拗，亦能保障雙方。