中美貿易戰、人民幣貶值，港股已經頭痕；美國制裁土耳其、里拉閃崩，更加頭暈。恒指昨日插低430點或1.5%，收27936。上周五收市後，恒指季檢開估，今趟換馬，換入黑馬中國生物製藥（1177）同申洲（2313），換出東亞（023）同招商局（144）。新貴登場，即藉染藍炒上。
兩隻新貴，市值都千四億左右，當中，申洲更係大價股，6月曾經升呢紅底股，高見102元。話時話，港股年頭見頂回落，藍籌紅底股亦減少，長和（001）、瑞聲（2018）降呢之後，只剩5隻，包括恒生（011）、新地（016）、港交所（388）、騰訊（700）同舜宇（2382）。
今年以嚟，魚缸5條藍籌紅衫魚，只得恒生同舜宇仍然錄得升幅，前者累升10%，後者累升22%。至於新地、港交所同騰訊，則分別累跌7%、4%、11%；以今年低位相對高位計，更撻生魚咁，分別撻低16.5%、26.6%、28.5%。騰訊周三放榜，隨時「食雞」不成蝕把米。
唔係藍籌嘅紅衫魚，本來今年魚缸仲有6條，不過，偉易達（303）同ASM（522）先後游走，只剩國浩（053）、萬邦（158）、宏利（945）同保誠（2378）。曾經差啲變身紅衫魚嘅就有平保（2318）同藥明生物（2269），可惜喺98元關口掉頭。藍籌新貴申洲，反而有勢。
申洲係紡織股龍頭，今年以嚟沿100天線反覆走上，6月一度變身紅衫魚，可惜撻返落嚟，過去兩個月喺90元至100元之間整固，昨日借力染藍逆流而上，高見99.8元，收96.6元，升2%，有望再變紅衫魚。
該股本月27日派成績表，市場預計中期盈利按年增長11%至20億元人民幣，預測市盈率近27倍。美銀美林估計，申洲2018年至2020年每股盈利年複合增長介乎17%至23%，並上調目標價至105元。滙證、野村、建銀更牛，分別睇118元、115.5元、115.4元。
割柑人
本欄逢周二刊出