袁詠儀（靚靚）噚日喺柴灣出席陶傑同陳海琪為ViuTV主持嘅新節目《大星講》做頭炮嘉賓。清減咗唔少嘅靚靚話近日因為接拍新電影，應導演要求要前瘦後肥，所以先減磅到未生仔時。佢話：「嗰時頂多110磅，如果去番呢個磅數可能個樣會好恐怖，都係圓潤啲幸福啲好。」
靚靚花近兩個月時間減磅，滿意現時體形，但因為政策上變動，電影之前開咗工，但有啲嘢要等審批，押後到10月再拍，所以佢要先keep住身形，感覺仲難過減肥，但拍完後會keep番圓潤啲。
「困擾咗四年」
講到老公張智霖前女經理人梁雅詩欺詐罪成，大後日會判刑，靚靚話：「香港法律制度好完善，合理，Chilam只係做一個證人工作，我哋配合律政司去做。」問佢以後會否幫老公睇合約規條？佢就話：「一路都冇睇，件事係天網恢恢，疏而不漏，點會突然有個人投訴，我又無啦啦同我老公講起，好似係個天想件事真相大白。」
不過，靚靚話希望有關所有人回歸正常工作，因為事件困擾咗四年，要配合政府做好多嘢：「今個暑假都冇得同阿仔去外遊，因為審訊要十幾日，我哋行唔開，事件可以圓滿解決就好，都拖咗咁耐。」
撰文：馮仁昭