英超上周六上演咗六場賽事，其中車路士喺尼高路簡迪、佐真奴費路同柏度洛迪古斯各入一球下，作客以3:0輕取哈特斯菲爾德。不過即使三分到手，藍軍領隊沙利（圖）仍敦促球隊喺八月餘下嘅時間要繼續進步。
沙利賽後話：「我非常開心，因為我以為喺上半季，球隊要攞分唔會係一件易事。喺上半場，我哋遇到啲困難，對方踢得好體力化；下半場對手可能體力消耗比較大，令比賽變得容易。幸運嘅係喺八月，我哋多數一周只得一場比賽，我哋要喺呢個月取得進步。」車路士下場聯賽，將會喺周六主場迎戰倫敦死敵阿仙奴。今夏大事擴軍嘅愛華頓，就喺逾半場打少一個，作客跟狼隊踢成2:2平手，當中身價達5,000萬鎊嘅新援李察利臣仲喺比賽中梅開二度，睇嚟拖肥糖應該無入錯貨喇。
