每年都掀起炒風嘅美心流心奶黃月餅，早前發售月餅券時，南亞排隊黨又出動，但原來有個社運界人士成功喺排隊黨中突圍，買入15張月餅券，呢個就係女長毛「蓮姐」雷玉蓮。
蓮姐同八方講，呢種月餅券首次開賣時，佢朝早返工時喺港鐵站見到有人排隊就跟住排，結果順利買咗5張。之後第二次開售，蓮姐就凌晨四點起身去排隊，結果排第一，買完再去另一個港鐵站入貨，最終前後買多咗10張。
可能大家都好奇，蓮姐買咁多流心月餅為乜？蓮姐話喎，「月餅應該用嚟食，唔係用嚟炒」，不忿排隊黨成日炒貴晒啲月餅券而入貨，即使現場有人高價同佢收購，佢都不為所動。咁多月餅當然唔係一個人食晒，佢話想將月餅送畀自己探望開嘅智障人士及服務佢哋嘅醫護人士，指知道班職員平日因工作關係，無時間去排隊買，仲話嚟緊有意將部份月餅券轉送其他有需要嘅慈善機構！