爆相爆片：
兒童池救生員　
「釣魚」辣㷫家長

正值暑假炎夏，最好嘅消暑活動梗係參與水上活動啦，政府有廣告提醒市民，記得去有救生員當值嘅泳灘！唔少家長亦都會趁暑假畀小朋友參加泳班學游水，但其實有救生員嘅公眾泳池，係唔係就一定安全呢？正所謂夏日炎炎正好眠，呢位救生員哥哥，可能返早未瞓醒，竟然當值期間俾家長見到佢懷疑「釣魚」，俾人影晒都唔知！
「有小朋友出事點算？救唔切㗎喎！」讀者李先生講起仲有啲勞氣，事緣佢上周三（8日）帶6歲嘅囝囝去黃大仙摩士公園游泳池參加游泳班，喺池邊陪上堂嘅李先生，得閒就周圍望，突然間望到對住2號兒童池嘅救生亭，有一位男救生員坐咗喺度，戴住黑超，棟高隻右腳，耷低頭，懷疑佢瞓着咗！

俾人影低晒都唔知

「唔理有幾多小朋友游水，當值期間都唔應該瞓覺啦！」由李先生提供嘅片段睇到，當時接近上晝9點，雖然泳客唔算多，但都見到有小朋友喺度游水，而個救生員郁都唔郁，因為佢戴住太陽眼鏡，所以睇唔到佢對眼係咪瞌埋。
不過，就算佢唔係瞓緊覺，咁嘅姿勢，都只能望到自己心口，而唔係望住個泳池！片尾部份，一位女救生員行埋去，疑似瞓覺嘅果位哥仔，終於抬起頭！「我見佢瞓咗好耐，我先舉機影，佢瞓到俾人影低晒都唔知。」李先生批評，救生員當值時瞌眼瞓，簡直罔顧泳客安全。
《蘋果》噚日朝早去過摩士公園游泳池視察，見到懷疑救生員瞌眼瞓嗰個救生員更亭對住兒童池，距離大約3米。由於兒童池水深唔到一米，救生員坐喺更亭入面直視，已經可以望晒成個兒童池嘅狀況，而當時有救生員當值，亦有幾個小朋友喺度游水。
康文署回應話一向重視員工紀律及操守，如果證實有違規情況，會按程序作出紀律處分。署方強調，會安排救生員輪流轉換崗位，避免佢哋長時間喺同一崗位工作。署方現時共有1,959名救生員，當中1,272人屬長期服務。