世盃後宣佈退出日本國家隊，再由墨超轉戰澳職墨爾本勝利嘅中場本田圭佑，禮拜日又有新搞作，宣佈將會出任柬埔寨國家隊嘅首席代表，不過工作本質上係呢支世界排名166位嘅國家隊教練，成為首位職業球員同時兼任國家隊教練職務。
上星期先至落實加盟澳職墨爾本勝利嘅本田圭佑，仲未幫新東家地標就再有驚人舉動。周日佢就宣佈將會出任柬埔寨國家隊嘅首席代表（Head of delegation），負責國家隊嘅公關同戰術調配等職務。雖然柬埔寨將會繼續由阿根廷籍嘅菲力斯干沙利斯擔任「教練」一職，不過實際上嘅教練工作則會由本田全權負責。
球員教國家隊世界第一人
本田圭佑喺記者會上就透露，因為自己擁有球員同教練嘅雙重身份，可能需要以遙距方式執教柬埔寨：「今次嘅工作可能係足球世界中嘅第一個例子，感謝柬埔寨足總畀呢個機會我，等我能夠展開教練生涯。由於我需要為墨爾本勝利比賽，可能唔可以兼顧兩支球隊嘅所有賽事，不過我盡可能會參與柬埔寨方面嘅工作，希望將呢個國家美好嘅一面宣揚畀全世界。」本田圭佑同柬埔寨素有淵源，幾年前佢就入主當地一間球會Soltilo Angkor FC，而呢隊波今季都升上甲組。柬埔寨喺9月10日將會主場友賽馬來西亞，本田屆時可能會首次領軍。
費格遜軒迪克曾身兼兩職
過往有唔少球壇名帥同時執教球會同國家隊（見附表），好似荷蘭教頭軒迪克咁，09年佢就曾經同時執教俄羅斯國家隊同擔任車路士嘅看守領隊；而前曼聯領隊費格遜亦都試過喺1985年兼任鴨巴甸同蘇格蘭嘅領隊。至於球員兼任教練或領隊嘅情況喺90年代幾盛行，當時車路士就先後有古列治同維埃里試過、80年代利物浦亦都有杜格利殊做過。不過好似本田咁做球員又做另一個國家隊教練，就真係第一人喇！
本田踢波就勁，會唔會教得掂都係未知數，好似教波初哥林柏特咁，上禮拜六英冠就領打比郡主場1:4輸畀列斯，而今季去教尼斯嘅韋拉，就喺法甲首輪主場0:1輸畀蘭斯。