facebook專頁「CityU Secrets」日前有帖文話，城大學生會編輯委員會喺本月8號出版嘅《迎新特刊》，封面貼有一張印住「迎新特刊」嘅奇怪貼紙，發帖者出於好奇心下撕開，發現係用嚟遮掩原本印喺正中間、惡搞校名校徽嘅設計圖樣，封面原先設計係將城大校徽中英文改為「ShittyU」、「又一城市大學」，編委事後為遮掩呢個「自嘲」logo而出此下策。
被斥「唔識尊重自己間學校」
該帖由專頁管理員發出，事件被揭發後不少學生同網民留言批評，指摘編委會玩過火。城大因為連接商場又一城，故被戲稱為「又一城市大學」，部份網民認為呢個惡搞都說得過去，但惹嚟最大不滿係將城大英文名「CityU」改為「ShittyU」，而且仲出自該校學生設計，唔少人狠批編委會「唔識尊重自己間學校」、「開玩笑過份咗」。
城大編委會日前對事件發佈《關於迎新特刊的聲明》，解釋遮蓋特刊原本設計嘅原由，話本月9號收到校方嘅警告，指刊物上使用校徽嘅方式可能會「引起混淆（confusion might be caused）」，要求遮蓋，編委會決定應校方要求蓋去原本設計，並就事件道歉。