李浩賢的大女兒雪凝（圖左），上周三（8日）三歲生日，「愛女號」的他在個人fb內寫出為人爸爸的甜酸苦辣，文中一句：「𠵱家每日一句『我好掛住daddy』，已經K.O.咗我喇！」看得出他生活有多開心，Max更從照顧女兒得到啟示，他寫道：「留一點童真，並不代表不夠成熟，只代表願意站在孩子角度出發。父母比孩子高，何不放下身段用他們的高度看這世界。」
以下是Max在fb的心底話，亦是一眾新手爸爸的生活寫照：
雪凝三歲生日喇！！
「由雪凝出世嗰日開始，外在同內在嘅壓力都好似千斤錘咁壓住我，當然並唔係生活上嘅壓力，而係作為新手爸爸望向未知嘅日子嗰份緊張，好多好多問題好似考試出題咁考我，又怕雪凝病，又怕佢跌親撞親，連夜晚講嘢大聲啲都怕會嘈醒佢。我真係好緊張，緊張到以為自己有病㖭！」
每日都問自己係咪有做好一個爸爸？
「日子一日一日咁過，雖然好緊張，但係見到雪凝一日一日咁長大，雪瑤又加入咗我哋嘅大家庭，我知道自己唔係一個全能爸爸，不過應該係一個可以依靠嘅爸爸，因為佢知道有咩事都好，爸爸都會喺左右嘅！」
「𠵱家每日一句『我好掛住daddy』已經K.O.咗我喇！雪凝好叻女咁就三歲喇！」