在家吃麵包及餐蛋麵，閱讀幾日報紙，睇到叙福樓集團收購灣仔「永華」，就想起此店以雲吞麵、竹昇麵馳名多年，生意好好，中午幾時都冇位，叙福樓應該係以理想價錢收購啩，否則永華東主點會肯出售老招牌吖，此店素來服務態度似劉德華廣告嘅金句，叙福樓CEO黃傑龍係新派人物，土木工程師出身，一定知道嘅，今時今日嘅服務態度唔能夠再數十年如一日，新一代醒目仔買上一代老招牌，必定要有新手法，始能夠讓老招牌生金蛋。
吃麵之際，想起大編輯送來一樽「烏橄欖菜」，乃汕頭長平路東海酒家產品，話專係用來與潮州粥一齊食嘅，潮州籍富豪視之為珍品。心念一動，開咗樽烏橄欖菜嚟伴食餐蛋麵，雖然唔多啱味，但純吃烏橄欖菜，已覺美味非比尋常，無怪潮州人士視之如寶。
一路食，一路睇報紙，見到梁振英大罵FCC觸碰紅綫，為港獨張目。背景係FCC（外國記者會）邀請「香港民族黨」之陳浩天演講，中國外交部駐港特派員公署主動聯絡FCC，要求停止，FCC不允，於是大公、文匯、建制派人士發動攻擊，梁振英係「發現港獨之父」，仲唔立即跑到台前開炮轟FCC咩？FCC理事（外國記者）早已向南華早報講明，香港傳媒有言論及討論自由，不會取消陳浩天演講。FCC呢次大膽了，膽敢得罪前特首及外交部駐港外交特派員公署，以後點算好？
閱報之際，手機響起，中環老友來電：「哈，你冇地方食飯嘞，上星期見到你在FCC食三文治，依家FCC得罪有權勢人士，而FCC會所係政府物業，他日租約期滿，實踢走FCC，懲罰吓呢班洋記者，梁振英係會記住呢件事嘅！」吓，唔會啩？港英總督麥理浩批准FCC搬上雪廠街會址（前牛奶公司凍倉），1982年尤德主持會所開幕禮，林鄭月娥於2007年負責與FCC談判新租約，對FCC理事讚揚FCC係香港寶貴資產，特區政府必定維護香港新聞言論自由，現在林鄭係特首，佢態度有冇改變呢？香港FCC係整個亞太區內最有歷史、最有風味嘅外國記者會，會員不限於外國特派員及駐港記者，外交使館人員，中環人士，好多都係會員，如果中國政府或者特區政府真係因為陳浩天事件而要「郁」FCC嘅話，肯定成為世界新聞，傷害香港國際形像。左丁山做咗FCC會員三十幾年，已有資格唔駛繳交每月會費，好希望當今特區當權派唔好煽風點火呀！