一位非洲男前晚上身赤裸只係着條短褲，喺灣仔一幢大廈簷篷上走嚟走去。附近有巿民仲以為是有人企跳，經了解原來嗰位非洲男被警方入屋搜查毒品時，一時心虛企出窗外想逃走，但最後梗係走唔甩，被警方拘捕帶署。
最終落網
讀者蔡先生表示，前晚11時許目擊一名赤裸上身穿波褲非洲男子，喺銅鑼灣希雲街29號希雲大廈單位爬出窗外，企係簷篷上踱步，不時望向街外，蔡一度以為佢想跳樓做儍事，附近居民及目擊途人見到呢一幕，亦都膽戰心驚。只不過實情就係灣仔警區特別職務隊人員，前晚去到嗰幢大廈進行掃毒行動，突擊搜查3樓一個目標單位時，嗰位非洲男懷疑畏罪爬出窗外，仲同阿Sir玩捉迷藏，結果當然逃唔過警員法眼，要求佢返入屋內。
據知呢位非法男同警員對峙數分鐘後被勸服，自行返回安全位置。警方其後出動警犬搜索，在屋內搜獲毒品，並一度懷疑有人將毒品掟落街，探員喺大廈地下一帶搜索，最後警方喺單位外發現小量懷疑毒品，拘捕該名27歲非洲男子，同當時係屋內另一名28歲非洲女子，兩人涉嫌藏毒，被帶署扣留調查。