新一個立法年度10月開始，每年暑假尾段，建制泛民立法會議員都會坐埋，討論來年委員會正副主席點樣分配。今年都未埋枱，八方已經聽聞，建制派有意將輪任成為房屋事務委員會主席嘅民主黨尹兆堅，同埋福利事務委員會主席嘅鄺俊宇拉落馬，原因好似係兩個人太搶風頭，做埋主席，可能有建制擔心因此失色喎！
推柯創盛做委員會主席
事實上，普遍委員會都會採取建制泛民每人兩年嘅輪任方式。以房屋事務委員會做例子，工聯會麥美娟連續兩年出任主席，至於過去兩年嘅副主席就係尹兆堅。據過去經驗，下年度兩人就會換位，但有知情人士同八方講，房屋係今屆政府重中之重，作為房屋事務委員會嘅角色會相當吃重，佢哋希望唔好畀機會尹兆堅出風頭，所以有意推舉民建聯柯創盛接任；至於阿尹，或者只能繼續做副手。
同樣情況亦出現喺福利事務委員會，建制一向放手將委員會交畀泛民，過去兩年分別由邵家臻同鄺俊宇任正副主席。按慣例鄺俊宇下個立法年度將坐正，但有指建制對鄺神喺委員會表現有不滿，密謀到時拉佢落馬。