公民黨黨魁兼立法會議員楊岳橋聯同資訊科技界議員莫乃光齊齊訪美睇當地科技產業，去咗都有一段時間，佢哋除咗睇Google、Tesla之外，仲惹來唔少「狂蜂浪蝶」，但係來者不善。多名「舊金山香港社團聯會」成員趁岳少一行人喺史丹福大學出席座談會，現身抗議，批評律師眾多嘅公民黨，對梁天琦被捕入獄及民族黨被取締未作支援。
「有心機同創意」
聯會喺facebook嘅專頁似乎噚日先至成立，內容暫時只得今次抗議嘅行動，包括行動新聞稿同埋照片，好似幾有針對性喎。聯會仲精心製作三大「見面禮」，包括「公民民主黨 攜手賣香港」紅底黃字橫額、投共獎狀，以及綁上黃絲帶嘅紅繩，嘲諷公民黨出賣香港利益，批評岳少喺民族黨事件中，要求政府界定國安紅線，而唔係捍衞言論自由，「特意送上紅線祝願其得償所願，此事不會波及公民黨，並繫上黃絲帶以表泛民勾結中共」。
由聯會上傳嘅相中可見，抗議者都係一班年輕人，但岳少面對一班來勢洶洶嘅後生仔，仲係笑笑口，接過投共獎狀等「大禮」，仲仔細研究。岳少回覆八方查詢指：「從政嘅嘢，梗係會有人唔支持你㗎啦。」但就欣賞同尊重幾個後生仔仲咁關心香港，「又有心機同創意，去到咁遠向我示威」。從政真係唔容易，隨時四面樹敵，但必須有氣度，接受各界意見。
李八方