13歲跳級神童以20分獲科大取錄修讀土木工程，報載此子很聽父親話，認為要贏在起跑線，早點畢業，香港大把大型基建項目上馬，不愁沒出路。
此語一出，不到一天，港鐵將幾個醜人革職，留下「我最負責任」的馬主席撐住倒塌的招牌。你OK，市民坐沙中綫完全唔知幾時PK。神童畢業後，請再次越級挑戰，踢走識條鐵的老屎忽，叫佢哋返屋企早唞前記得祈禱，天口㷫，記得着多幾條底褲，否則「蒙在鼓裏」（淫審同義詞：一褲都係）會一而再，再而……柒地發生！
港鐵還有沉降恐怖數據，遍及港九新界站頭，陳局長照舊「我都係睇新聞才知」。問責下台嗎？借馬主席金口神回：「我是個負責任的人。」負責任阻住地球轉，失責、卸責的局長繼續「宅」。「問宅」？有呀，搵風水佬查了八字問過家宅，佢好肯定可以做到林鄭連任咁話！陳智思鐵定與娥行埋，索性幫口鬧人，收返高球場起樓？有夠蠢的！撐填海鎖定大嶼山，目測填出來的島，一定不會飄移！一邊填海一邊下令三條鐵路一齊動工，未來的大嶼山繼一地兩檢後，率先歸位大灣區！大灣嶼落實動土，沙中綫短筋不存在啦，叫梁愛詩監工，搵解放軍幫手，炸咗佢！