讀者楊先生前日下晝5點幾，喺銅鑼灣登龍街嘅寫字樓返工，其間突然見到隔咗兩條街、樓高40層嘅希慎廣場中層位置，有一個着粉紅色衫嘅男仔，企喺平台邊緣，佢背向街，舉起單手唔知做乜，楊先生初時仲以為佢想跳樓，嚇到個心都離一離。
再睇定啲，廿幾秒之後嗰個男仔就放低手，然後企咗一陣，又再行近邊緣，當時都幾大風，件粉紅色衫隨風飄揚，楊先生覺得好牙煙，猶豫緊使唔使報警，其間佢聽到有警車響聲，但唔知係唔係去緊嗰度，好彩冇幾耐個男仔坐低咗，楊先生先鬆一口氣，仲話如果佢真係跳落嚟都唔知點算。
話口未完，粉紅衫男仔又走出啲，今次直頭坐喺平台邊，面向街，兩腳吊吊揈，然後仲多咗個男仔出現，好似拎住部手機幫粉紅色衫男仔影相。楊先生覺得影相唔使咁博吓嘛，咁樣好危險！希慎廣場喺2012年8月10號開幕，商場部份合共17層。
屬私人地方 希慎報警
希慎發言人話，嗰兩個男仔身處嘅位置係希慎廣場16樓嘅走火層，佢哋喺未經授權嘅情況下蓄意打開上咗鎖嘅走火門，走咗入去唔係開放畀公眾嘅地方，做出啲唔適當嘅行為。由於事件涉及擅闖私人地方，有關部門已經報警處理。
有人為咗打卡可以去到好盡，電影《志明與春嬌》而爆紅嘅九龍灣一條行人天橋，被稱為「志明橋」，舊年年頭吸引咗好多少男少女去打卡，有人為影靚相爬上3層樓高橋頂或者危坐天橋窗邊，搞到消防員頻頻出動，有消防員忍唔住喺fb貼文，呼籲巿民唔好再冒險去影相㖭。
