許冠傑同譚詠麟前晚喺紅館舉行「阿Sam & 阿Tam Happy Together演唱會Part2」第四場，除咗搵到鍾鎮濤做嘉賓，仲有唔少紅人都有去到紅館捧場，除咗薛家燕、胡楓、鄭丹瑞及黎耀祥等人，又點少得阿Sam忠實粉絲特首林鄭月娥。
原來前晚娥特就沙中綫事件見完傳媒，就急急腳直奔紅館，仲趕得切喺開騷前入後台探班，同阿倫阿Sam影返張合照，影完一輪selfie，娥特仲蹺實Sam㖭。咁其他藝人見到娥特到場，亦齊齊搵佢影相，全場齊齊集郵，大會方面亦識做，安排娥特坐VIP位睇騷，佢都好似一般歌迷咁投入，不時起身拍打吹氣棒。